အစိုးရသစ်၏ တစ်နှစ်တာ ကာလအတွင်း ပြုပြင်ပြောင်းလဲရေး ဆောင်ရွက်ခဲ့မှု အစီအစဉ် ရိုက်ကူးထုတ်လွှင့်ဖော်ပြ နိုင်ရေးအတွက် ညှိနှိုင်းအစည်းအဝေးကျင်းပ

နေပြည်တော် ဖေဖော်ဝါရီ ၁၇
အစိုးရသစ်၏ တစ်နှစ်တာကာလအတွင်း ပြုပြင်ပြောင်းလဲရေး ဆောင်ရွက်ခဲ့မှု အစီအစဉ် ရိုက်ကူးထုတ်လွှင့်နိုင်ရေးအတွက် ညှိနှိုင်းအစည်းအဝေးကို ယနေ့နံနက် ၁၀ နာရီတွင် နေပြည်တော်ရှိ ပြန်ကြားရေးဝန်ကြီးဌာန စုပေါင်းခန်းမကြီး၌ ကျင်းပသည်။

နိုင်ငံတော်သမ္မတရုံး၊ ပြည်ထောင်စုလွှတ်တော်၊ ပြည်သူ့လွှတ်တော်၊ အမျိုးသားလွှတ်တော်၊ ပြည်ထောင်စုလွှတ်တော် ချုပ်ရုံး၊  ပြည်ထောင်စုဝန်ကြီးဌာနများ၊ ပြည်ထောင်စု ရှေ့နေချုပ်ရုံး၊ ပြည်ထောင်စုစာရင်းစစ်ချုပ်ရုံး၊ ပြည်ထောင်စုရာထူးဝန် အဖွဲ့၊ တိုင်းဒေသကြီး၊ ပြည်နယ်နှင့် နေပြည်တော်ကောင်စီတို့၏ တစ်နှစ်တာကာလအတွင်း ပြုပြင်ပြောင်းလဲရေး ဆောင်ရွက်ခဲ့မှုများကို ဖေဖော်ဝါရီလ နောက်ဆုံးပတ်မှ စတင်ရိုက်ကူးပြီး မြန်မာ့ရုပ်မြင်သံကြားနှင့် ကြေးမုံ၊ မြန်မာ့အလင်း သတင်းစာတို့တွင် မတ်လအတွင်း စတင်ထုတ်လွှင့်ဖော်ပြ သွားမည်ဖြစ်ကြောင်း သိရှိရသည်။
အစိုးရသစ်တာဝန်ယူ ဆောင်ရွက်မှုကာလ တစ်နှစ်ပြည့်မြောက်တော့မည် ဖြစ်ကြောင်း၊ အစိုးရသစ်၏ ပြည်သူကို ရှေးရှုဆောင်ရွက်သည့် နိုင်ငံရေး၊ စီးပွားရေး၊ လူမှုရေးဆိုင်ရာ ပြုပြင်ပြောင်းလဲရေး ဆောင်ရွက်မှုများ၊ အသစ်တိုးချဲ့ ဆောင်ရွက်မှုများကို ပြည်သူက ရွေးချယ်တင်မြှောက်လိုက်သည့် အစိုးရအနေဖြင့် ပြည်သူကို အစီရင်ခံတင်ပြရ မည်ဖြစ်ကြောင်း၊ မဏ္ဍိုင်အသီးသီးနှင့် ၀န်ကြီးဌာနများ၏ ဆောင်ရွက်မှုများ၊ တိုင်းဒေသကြီး၊ ပြည်နယ်များ၏ တစ်နှစ်တာ ကာလအတွင်း ဆောင်ရွက်ခဲ့မှုများနှင့် အနာဂတ်တွင် ပြည်သူ့အကျိုးအတွက် ဆောင်ရွက်မည် အစီအမံများကို ပြည်သူသို့ တင်ပြဆောင်ရွက်ခြင်းများ ပြုလုပ်ရန်အတွက် ယခုကဲ့သို့ အစိုးရသစ်၏ တစ်နှစ်တာကာလ ပြုပြင်ပြောင်းလဲရေး ဆောင်ရွက်မှု အစီအစဉ် ရိုက်ကူးထုတ်လွှင့်ရေးကို စီစဉ်ဆောင်ရွက်ခြင်းဖြစ်ကြောင်း ပြည်ထောင်စုဝန်ကြီး ဒေါက်တာ ဖေမြင့်က အဖွင့်အမှာစကား ပြောကြားရာတွင် ထည့်သွင်းပြောကြားခဲ့သည်။
အစည်းအဝေးတွင် မြန်မာ့အသံနှင့် ရုပ်မြင်သံကြား ညွန်ကြားရေးမှူးချုပ် ဦးမြင့်ထွေးက ရိုက်ကူးထုတ်လွှင့်သွားမည့် အစီအစဉ်များနှင့် သတင်းနှင့်စာနယ်ဇင်းလုပ်ငန်း ဦးဆောင်ညွန်ကြားရေးမှူး ဦးကျော်စိုးက သတင်းစာများတွင် ဖော်ပြမည့် အစီအစဉ်များကို ရှင်းလင်းတင်ပြကြသည်။
ယင်းနောက် တက်ရောက်လာကြသည့် ပြည်ထောင်စုအဆင့် အဖွဲ့အစည်းများ၊ ပြည်ထောင်စုဝန်ကြီးဌာနများနှင့် တိုင်းဒေသကြီး၊ ပြည်နယ်အစိုးရအဖွဲ့များမှ ကိုယ်စားလှယ်များက ပြင်ဆင်ဆောင်ရွက်သွားမည့် အခြေအနေများနှင့် မရှင်းလင်းသည်များ မေးမြန်းဆွေးနွေးကြသည်။
ထို့နောက် ပြည်ထောင်စုဝန်ကြီး ဒေါက်တာဖေမြင့်က လိုအပ်သည်များ ပေါင်းစပ်ညှိနှိုင်းပေးပြီး နိဂုံးချုပ်အမှာစကား ပြောကြားခဲ့သည်။

(သတင်းစဉ်) 

via Myanmar Info Minst http://ift.tt/2lVoafj http://ift.tt/1KnLGaX

Leave a Reply